PDA المساعد الشخصي الرقمي

عرض كامل الموضوع : شاعر الزمن الجميل



ليل و طرب
10-10-2014, 08:52 AM
http://www.youtube.com/watch?v=-t7RYEb_1EA

..


أعذرني يا سيدي الزمان فيني على الدنيا عتب

الرجل حيرها المكان و العين حيرها العجب


تغيرت كل الامور و احترت في مفهومها

النايمه قامت تثور و الصاحيه جا نومها


النجم ماهو نجمنا و الليل ماهو ليلنا

و الصوت ماهو صوتنا و العشق ماهو عشقنا


تمطر ولا يظهر نبات و نبات ما جا له مزون

وعيون ما فيها حياة و حياة ما فيها عيون


اسافر بفكري و أتوه و اناظر بعيني قريب

في عالمي زحمة وجوه وانا مع الزحمه غريب


صقار ما عندي صقر خيّال ما عندي فرس

بيني و فرحات الدهر من لعبة ايامي حرس


قصيدتي لعبة عمر و خيالتي صهوة سحاب

غنيت في شمس و قمر حضرت في لحظة غياب


طالت مسافات الزمان وشلون ابقطعها مشي

فراغ مليان المكان و خيالنا اصبح غشي



..


لمت الزمان ولايم الوقت غلطان
حوادث الأيام من فعل أهلها

كل يغني مع زمانه على شان
هذا يميلها وهذا عدلها

وانا نديم الوجد في ليل الأشجان
اجاذب نجوم الليالي غزلها

ياما جرت بونتي ليل الأحزان
ياما سمع مني وياما حملها

وياما رقص مع نغمة الحب نشوان
ينفض عن النجمات وحشة مللها

قصيدتي رعشة خفوق ووجدان
صوت بها الساري وردد مثلها

قصيدتي غنيتها روح الانسان
اللي معانيها بروحه صقلها

اللي غدى في شوفة العين ميزان
غيره الى شافته عيني خذلها

يا عايش باللو والليت خسران
دنياك ما تسوى حسايف زللها

يروح عمرك بين لو كان ما كان
والعمر ساعه ما تساوي عذلها


..



على حـد الزمن واقف .. وأشاهد عبرة الأيــام
وشمس العمر تغرق في بحرها .. لين يخفيها

وأشوف الليـل يكبر .. والنهار يذوب في ظــلام
حزينة لحظة المغرب .. وداع النور يطفيها

وأشوف الموج يرقص .. والدموع من السحـاب رزام
عجيبة رقصة الموجة .. ودمع الغيم يبكيها

وأشاهد غربة الموجه .. لقت عقب السفر مقــام
على رمل السهل .. تالي زبدها ما يوعيها

سرى بي هاجس الذكرى .. على متن الخيال .. وهام
يرد الذهـن لأيام تعدتني لياليهــا

أضم الطيف بعيوني .. وأعانق ساري الانســـام
واردد نغمة الماضي على قلبي .. وأغنيها

ألا يا ليـــل .. يا ليل الغريـب اللي سهر ما نام
تـذكر له عل بعد المســافة عين يغليهـا

أمانه يا قمـــر .. يــا ســاري بالليل خذ سلام
وصبـه شـوق في عين الذي عيني معنيها

حنين الولف .. ياهل الولف .. يجلب للقلوب هيـــام
ومن يجرح قلوب الولف .. لابده يداويهـا

اغني للقلـوب .. اللي عــزاهــا بالحيــاة أحلام
وارد الشـان .. لاهــل الشــان .. بأولها وتاليهــــا



- خالد الفيصل