دورات تطوير الذات دجل ونصب وشعوذه واحتيال (البعض الكثير)
كلنا شايفين في السنوات الاخيرة انتشرت الدورات اللي تختص بتطوير الذات والبرمجة العصبية بشكل رهيب ، ويقولون انه الهدف منها تثقيف الناس في تطوير ذاتهم ، وطبعا يحاولون يجذبون الناس بعناوين ملفته فيها عن المال والثراء وكسب الأصدقاء والحياة .. وهالدورات اللي في كل شهر او شهرين تشوف لهم إعلان ودعاية في نادي أو جمعيه وحتى في المناسبات والمهرجانات يعني لهم في كل مكان غزو .
وفي ناس من تشوف هالعناوين وخاصة عن المال وكيف تصبح ثريا وكيف تحافظ على محفظتك على طول يروحوا يسجلون ، ما يدرون انه تم استغلالهم لثراء الشخص اللي عامل الدورة فقط اللي هو لا دكتور ولا هم يحزنون ، وإذا سميته استاذ يكون استاذ النصب والكذب والاحتيال والشعوذه والدجل .
انا اللي خلاني اقول هالكلام لأنه من فترة كنت اشوف بالتلفزيون المذيعة سألت سؤال كان يدور في بالي لاني ملاحظته تقول لضيف البرنامج معقولة ازدياد كبير لمدربين تطوير الذات ولهدرجة صاير الموضوع سهل أنه الواحد يصير مدرب معتمد ، ومعظهم يحط لك انه مدرب او مدربة معتمد ، طيب معتمد من أي جهة ؟؟! من جهة أو مركز تابع لمركز اوروبي . شنو هالكلام جاصين على الناس في السنة يطلعون 1000مدرب وكثير منهم يتفننوا في الاحتيال على المشاركين بهالدورات خذوا مثلا :
يقولك غمض عينك وتخيل اتك جالس واحداث وبعدها فتح عينك وتحس انك مرتاح ومقتنع ( يا رباه ).
والثاني يقول طاقه سلبية وايجابيه وقوم واوقف وانبطح وبعدها قوم ولف يمين وروح يسار وبعده حط يدك اليمين فوق راسك والثانية تحت واجلس على الكرسي ويسأله شنو شعورك ؟والمتدرب يجاوب : حسيت براحه وابتسامة .
وللاسف بعضهم يدخلوا في امور العقيدة عن القضاء والقدر وغسيل مخ وبيع كلام ووهم .والمصيبة تدرون كيف انه لو واحد مثلا عمل دورة واللي سجلوا فيها مثلا 30 شخص وهالدورة مدتها 3 ايام ورسوم الدورة 500ريال ، يعني اضرب 500 في 30 يطلع 15000 خلال 3 ايام فقط . وأتمنى ما اشوف احد يكتب ايش هالحسد ، اقسم بالله لا حسد ولا حقد ولكن هذه الحقيقة الكذب والنصب والاحتيال وبيع الوهم لناس للاسف ضعاف واسنزاف جيوبهم وهذا كله في 3 ايام وبعدها يروحوا منطقة ثانية يعملوا فيها دورة ونفس الطريقة وهكذا .
والمشكلة الكبيرة انه هالمتدربين ال30 بعد حضور هالدورة يصيروا بكل سهولة مدربين معتمدين خلال 4 او خمس دورات وتوقيع من المدرب اللي معتمد من ذاك المركز وبالتالي تستمر المهزلة ونفض جيوب بدعوى تطوير ذاتهم
