الإجراءات في الدوائر الحكومية عندنا لا زالت متخلفة عن الركب.. من المسؤول ؟
تحية طيبة
من الساعة عشرة صباحا حتى الثانية والنصف مساءً وأنا من البنك إلى الأحوال المدنية !
المسألة أبسط مما تتصورن! مجرد تجديد بطاقة صراف للوالدة .. يتعلق بالتقاعد
ولكن طلبوا معرف
والتعريف لازم ببرنت من الأحوال
اروح "الأحوال المدنية" يقولوا تجيب خطاب من البنك
اروح "البنك" يقولوا احنا مؤسسة ما نعطي خطاب للجهات الحكومية
اروح لمدير البنك حصلته فوق بالدور الثاني مسترخي ومنزل شماغه وكأنه جالس في بيته
ما كأنه في مكان عمل ، نفس الوضع قال: ما نرسل خطاب للجهات الحكومية احنا مؤسسة
رحت الأحوال وفورا طلبت المدير .. لاحظت في أكثر من مدير وكل واحد مسؤول
فاخترت أكبرهم، دخلت على هذا المدير قالي: احنا نتعامل حتى مع المؤسسات
والخطأ من البنك نفسه وهذه معلومات مواطنين ما نقدر نعطيها احد
إلا بخطاب رسمي سواءً من المؤسسات أو الشركات أو الجهات الحكومية الأخرى
إلى الآن والله ما أخذت البرنت هذا
ولكن، بالله وش ذنب المراجع يعلق بين هذه الدوائر والمؤسسات ومشاكلها ؟
يفترض يكون في تنسيق وترابط وتبادل معلومات سريع، والأمور الآن سهلة
في شيء اسمه الآن "الحكومة الإلكترونية" كل دائرة ومؤسسة مرتبطة بالأخرى الإلكترونيا
لكن يمرمطون المراجعين بهذا الشكل.. الأحوال في ناحية
والبنك في ناحية آخرى وتقعد رايح جاي عليهم
ويمكن تهون معاية.. أنا ابن المدينة واعرف موقع الأحوال والبنك
بس المراجع اللي قادم من الهجر والقرى البعيدة وبعضهم حتى كبار سن
ما يتحمل يقعد جاي ورايح عشان خاطر زعل البنوك على الأحوال أو العكس
هذه دوائر ومؤسسات غير ملتزمة بالأنظمة ولا يوجد أصلا نظام بينهم
ولا يعرفون التعامل بالإيميل، لازولوا "ورقيين" !
وضروري يحصل مراجعة وضبط لهذه المسألة
لجعل هذه الدوائر أكثر مرونة وأداء وسرعة
الناس والله تتعب كثير عشان تخلص اوراقها ويحصل تأخير في انجاز معاملاتها.
والله المستعان
